«Եթե ճիշտ է, անհրաժեշտ է ԲՀԿ-ին դատել». Հրանուշ Խառատյանը դեմ է այդ խաբեությանը

Ազգագրագետ Հրանուշ Խառատյանը ֆեյսբուքյան իր էջում գրել է.

«Եթե ճիշտ է, որ «օպերատիվ-հետախուզական միջոցառումներով պարզվել է նաև, որ Նաիրա Զոհրաբյանը համախոհների հետ ունեցած խոսակցությունների ընթացքում բազմիցս ընդունել է այն փաստը, որ «Բարգավաճ Հայաստան» կուսակցությունը նախկին տարիներին անցկացված ընտրություններում անհրաժեշտ քանակի ձայներ կարողացել է ապահովել բացառապես ՀՀ քաղաքացիներին ընտրակաշառք

բաժանելու արդյունքում՝ բառացիորեն հայտնելով հետևյալը․ «…պարզվեց՝ ԲՀԿ-ն առանց ընտրակաշառքի Հայաստանում ձեն չունի… պիտի ճշմարտության երեսին նայե՞նք, թե՝ չէ, էտա…, իրականությունն էտա…», եթե ճիշտ է, որ բացի Նաիրա Զոհրաբյանի խոստովանությունը փաստերով հաստատվել է, որ ԲՀԿ-ի ընտրություններն անցել են ընտրակաշառքով, պարզապես անհրաժեշտ է ԲՀԿ-ին դատել որպես իրավաբանական պատասխանատվության կառույց (չեմ կարողանում գրել «կուսակցություն»), և որպես կուսակցություն լուծարել:

Չի կարող, չպետք է այդ կարգի կառույցը կուսակցություն կոչվել և որպես կուսակցություն մասնակցել Հայաստանի քաղաքական օրակարգերի ձևավորումներին:

Առավել ևս, որ այդ խմբի «կուսակցականները» հավատարմության երդմնակալության գրավոր հավաստագրեր են հանձնել «կուսակցապետին»: Մարդկանց այդ խումբն անձին է ծառայել, ոչ թե երկրին: Նրանց «քաղաքականությունն» ուղղված է եղել երկրի քաղաքական, նյութական, հասարակական ռեսուրսներն անձին ծառայեցնելուն:

Նրանք խախտել են Սահմանադրությունը՝ Սահմանադրության hոդված 94-ով «Պատգամավորը ներկայացնում է ամբողջ ժողովրդին, կաշկանդված չէ հրամայական մանդատով, առաջնորդվում է իր խղճով և համոզմունքներով»:

ԲՀԿ-ի պատգամավորների մանդատները սահմանափակված են Ծառուկյանի հրամայական խղճով և համոզմունքներով: Սրանց «կուսակցություն» կոչելը մե՜ծ շռայլություն է:

Անկախ նրանից, թե ինչպես կորոշվի Ծառուկյանի անհատական ճակատագիրը, եթե նույնիսկ իրավապահ համակարգը որոշի, որ նա նորածին մանկան նման անմեղ է իր բիզնես գործունեությունում, «Բարգավաճ Հայաստան» կուսակցություն լինել չի կարող:

ԲՀԿ անվան տակ հավաքված մարդիկ անհատին՝ Ծառուկյանին, ծառայողներ են, ոչ թե գաղափարի շուրջ միացած մարդիկ՝ կուսակցականներ: ԲՀԿ-ն որպես կուսակցություն պիտի լուծարվի:

Հասկանալի է, որ սա լրջագույն քաղաքական ճգնաժամ է: Առանց ԲՀԿ-ի ներկայիս ԱԺ-ն չի կարող գործել, այնտեղ առնվազն երկու ընդդիմադիր քաղաքական ուժ պիտի լինի:

Բայց ձևացնել, որ այդ ուժերից մեկը կարող է ԲՀԿ անունը կրող մարդկանց խումբը լինել, թե՛ ինքնախաբեություն է, թե՛ հանցանք:

Նրանք արդե՛ն խաբել են Հայաստանի ընտրողներին՝ որպես կուսակցություն ներկայանալով:

Չի՛ կարող այս խաբեությունը շարունակվել: Իսկ խաբեությունը կշարունակվի, եթե ԲՀԿ-ն որպես կուսակցություն մնա ԱԺ-ում:

Սա կնշանակի, որ ԱԺ-ն հավանություն է տալիս քաղաքական խաբեությանը:

Առանց այդ էլ հասարակության մեջ հասունանում է այն ցավոտ համոզմունքը, որ ՔՊ-ն կրկնում է մեկ անձին ծառայող մարդկանց խումբը կուսակցություն ներկայացնելու փորձը:

Առավել ևս, որ 2018թ. ՔՊ ընտրությունը մեծ հաշվով մեկ անձի ընտրություն էր:

Ստեղծված իրավիճակում արդարն ու լավագույնն այն կլիներ, որ ԲՀԿ-ի լուծարման որոշում կայացվեր, և պառլամենտական ճգնաժամից դուրս գալ արտահերթ ընտրություններ նշանակելով:

Վերջին երկու տարիներին բավական փորձ և գիտելիք է կուտակվել թե՛ կուսակցություններում (այդ թվում ՔՊ-ում), թե՛ հասարակությունում:

Բայց դա կարելի է և պետք է անել դատա-իրավական համակարգը կարգի բերելուց հետո:

Ներկայիս համակարգով որևէ ընտրություն պարզապես հնարավոր չէ անց կացնել, դա կվերաճի քաղաքացիական կռվի տանող անկառավարելի քաոսի»:

Facebook Comments
Գնահատականը
( 3 оценки, среднее 5 из 5 )
ՉՄՈՌԱՆԱՔ ԿԻՍՎԵԼ ԸՆԿԵՐՆԵՐԻ ՀԵՏ
Հայ Ինֆո